Sai Cabinet Meeting : साय कैबिनेट के बड़का फैसला: रायपुर मा 23 जनवरी ले पुलिस कमिश्नरेट प्रणाली सहित जानव अउ का-का होईस 

Sai Cabinet Meeting : रायपुर। मुख्यमंत्री विष्णुदेव साय के अध्यक्षता मा बछर के आखिरी कैबिनेट बैठक मा जनहित मा कई ठन बड़ फैसला ऊपर मुहर लगीस हे। ये बैठक मा राजधानी रायपुर के सुरक्षा ले लेके किसान, राइस मिलर्स अउ गरीब मन बर राहत के पिटारा खोले गे हे।

Sai Cabinet Meeting : रायपुर मा अब ‘पुलिस कमिश्नर’ राज: 23 जनवरी ले नवा व्यवस्था
राजधानी रायपुर ला अब महानगर के तर्ज मा पुलिस कमिश्नरेट प्रणाली मा बदले के फैसला हो गे हे। 23 जनवरी ले रायपुर मा ये व्यवस्था लागू हो जाही। एखर ले कानून व्यवस्था ला सुधारै मा मदद मिलही अउ पुलिस ला जादा अधिकार मिलही। संगे-संग, पुलिस मुख्यालय मा एक नवा ‘विशेष कर्तव्यस्थ अधिकारी’ (OSD) के पद घलो बनाय के मंजूरी दे गे हे।

read more : Swiggy Zomato Strike Update : हड़ताल ले डरे स्विगी-जोमैटो : डिलीवरी बॉय मन बर खोलिन खजाना, नवा साल मा  हजारो कमाय के मौका

राइस मिलर्स ला बैंक गारंटी मा भारी राहत
धान के कटोरा छत्तीसगढ़ मा राइस मिलर्स मन बर सरकार ह बड़ राहत देहे हे। अब कस्टम मिलिंग बर बैंक गारंटी मा लगने वाला स्टाम्प शुल्क ला 0.25% ले घटा के 0.05% कर दे गे हे। एखर ले मिलर्स मन के खरचा कम होही। संगे-संग, उसना मिलिंग मा प्रोत्साहन राशि ला 20 रुपिया ले बढ़ा के 40 रुपिया प्रति क्विंटल कर दे गे हे।

तेंदूपत्ता अउ लघु वनोपज संग्राहक मन बर बड़ निर्णय
तेंदूपत्ता खरीदी: बछर 2026 बर 5,500 रुपिया प्रति मानक बोरा के दर ले तेंदूपत्ता खरीदे बर सरकार ह गारंटी देहे के अनुमति दे देहे हे।

कोदो-कुटकी: छत्तीसगढ़ राज्य लघु वनोपज संघ ला कोदो, कुटकी अउ रागी खरीदे बर ‘कार्यशील पूंजी’ दे जाय के फैसला होय हे।

ब्याज मुक्त ऋण: लघु वनोपज संघ ला 30 करोड़ रुपिया के ब्याज मुक्त ऋण (Interest-free loan) दे जाही, जेखर ले व्यापार अउ संग्रहण मा तेजी आही।

कर्ज के बोझ होही कम: 55.69 करोड़ के भुगतान
राज्य शासन ह अंत्यावसायी सहकारी वित्त एवं विकास निगम डाहर ले पांच राष्ट्रीय निगमों ले लिय गे कर्ज ला चुकाय बर 55.69 करोड़ रुपिया के बजट प्रावधान ला मंजूरी देहे हे। एखर ले सरकार ला हर बछर 2.40 करोड़ रुपिया के ब्याज नई पटाना पड़ही अउ वित्तीय बोझ कम होही।

ऑटो एक्सपो मा गाड़ी खरीदना होही सस्ता
रायपुर के साइंस कॉलेज मैदान मा 20 जनवरी ले 5 फरवरी तक होवइया 9वें ऑटो एक्सपो मा गाड़ी खरीदने वाला मन बर दिवाली जइसन ऑफर हे। एक्सपो मा बिकइया वाहन मन ऊपर लाइफ टाइम रोड टैक्स मा 50% के छूट दे जाही। ये फायदा पूरे प्रदेश के ग्राहक मन ला मिलही।