SIM Binding News : 2026 ले बदल जाही तुंहर मोबाइल के दुनिया, सरकार लावत हे सिम-बाइंडिंग के नवा नियम

SIM Binding News : रायपुर: अगर आप मन घलो अनजान नंबर ले आथे फोन अउ व्हाट्सएप म फालतू मैसेज ले परेशान हो, त अब फिकर झन करव। भारत सरकार ह साल 2026 ले मोबाइल चलाय के नियम म अइसन फेरबदल करे बर जावत हे, जेकर ले ठगी करे वाला मन के नाहर खिंचा जाही। ये नवा नियम के नाम हे CNAP (सी-नैप) अउ SIM-Binding (सिम-बाइंडिंग)। एला लागू होय के बाद कोनो घलो अइसन-वैसे मनखे आप ला फोन करके ठगे नइ सकही।

SIM Binding News : का हे ये CNAP? अब कोनो ‘अनजान’ नइ रहही!

अभी का होथे, जब कोनो अनजान नंबर ले फोन आथे त हमन डरा जाथन कि काकर फोन होही। कई बार ठग मन ‘बैंक मैनेजर’ या ‘पुलिस’ बनके फोन करथें। लेकिन 2026 ले जब घलो कोनो के फोन तुंहर मोबाइल म आही, त ओकर असली नाम (जे नाम ले सिम खरीदे गे हे) तुंहर स्क्रीन म दिखही। अब कोनो अपन नाम छुपा के आप ला बेवकूफ नइ बना सके। ट्रू-कॉलर (Truecaller) म त मनमर्जी नाम लिख देथें, फेर सरकार के ये नवा नियम म ‘केवाईसी’ (KYC) वाला असली नाम ही दिखही।

read more : ED Raid Chhattisgarh : छग म सियासी घमासान : रायपुर ले महासमुंद तक हड़कंप, मंत्री टंकराम बोलिन- कोनो नइ बाचही, बैज ह बताइस खानापूर्ति

सिम-बाइंडिंग: व्हाट्सएप ले ठगी अब हो जाही बंद

आजकल ठग मन का करथें? एक ठन सिम ले व्हाट्सएप बनाथें अउ फेर ओ सिम ला फेंक देथें। सिम बिना घलो व्हाट्सएप ले ठगी चलत रहिथे। फेर अब अइसन नइ होही! सिम-बाइंडिंग नियम के मतलब ये हे कि जउन नंबर ले व्हाट्सएप चलत हे, ओ सिम के मोबाइल म लगे रहना जरूरी होही। जैसे ही कोनो मोबाइल ले सिम निकालही, ओकर व्हाट्सएप अउ मैसेजिंग एप अपने-आप बंद हो जाही। ए नियम ले फर्जी व्हाट्सएप एकाउंट चलाय वाला मन के धंधा चौपट हो जाही।

काबर जरूरी हे ये नियम?

आजकल छत्तीसगढ़ म घलो डिजिटल ठगी के मामला बाढ़ गे हे। कोनो ल निवेश के लालच देथें त कोनो ल डरा के पइसा लूट लेथें। सरकार के कहना हे कि ये दूनों नियम ले ठग मन के ‘लोकेशन’ अउ ‘असली पहचान’ पाना आसान हो जाही। 2026 तक एला देशभर म अनिवार्य करे के तैयारी हे।