न्याय बर उमेद ले युवक करिस एसपी दफ्तर मं गंगाजल ले शुद्धिकरन”

मनेन्द्रगढ़ मं जमीन विवाद के मामला मं एक अनोखा तरीका देखे ला मिलिस। चैंपुर के रहइया रघुनाथ सिंह गोंड नाम के युवक अपन पूर्वजमन के जमीन मं होय अवैध कब्जा ले परेसान हवे। वो कई बेर थाना अऊ एसपी दफ्तर मं सिकायत कर चुके हावय, फेर ओकर मामला मं अब तक कोनो ठोस कारवाही नइ होइस।

एही ले वो अपन दुख अऊ विरोध ला देखावत एसपी दफ्तर मं गंगाजल ले शुद्धिकरन करिस अऊ पूजा-पाठ करिस। रघुनाथ के कहना हावय के वो 2022 मं तहसील दफ्तर के आगू तीन दिन तक आमरण अनशन मं बैरिस, फेर ओकर बात मं कोनो सुनवाई नइ होइस। अब वो उम्मीद करत हवय के नवा एसपी के आगमन के बाद ओकर फरीद सुने जाही अऊ दोषी मन ऊपर कारवाही होही।

आरटीआई एक्टिविस्ट रमाशंकर गुप्ता घलो ए मामला के गंभीर बताइन। वो कहिन के राजस्व अभिलेख मं छेड़छाड़ होय हवय, जेकर जिम्मेदारी पुलिस के हावय। अब तक पुलिस ले कोनो ठोस कदम नइ उठाय गिस।

ए घटना अब पूरा इलाका मं चर्चा के विषय बन गिस। लोगन के कहना हावय के जब न्याय नइ मिलिस त रघुनाथ ला एइसन प्रतीकात्मक कदम उठाना परे। अब सब्बो ला उम्मीद हवय के नवा पुलिस अधीक्षक मामला के गंभीरता ला समझही अऊ पीड़ित ला न्याय दिलाही।