नवा नर्सिंग कॉलेज ले बढ़ही स्वास्थ्य के रंग – 78 करोड़ के मंजूरी ले मिलही युवामन ला नवा मौका”

छत्तीसगढ़ सरकार अब स्वास्थ्य शिक्षा मं नवा अध्याय जोड़त हवय। मुख्यमंत्री विष्णुदेव साय के महत्तपुरन घोषणा ऊपर अब सरकार मुहर लगा दे हे। 9 नवा नर्सिंग कॉलेज के भवन बनाय बर 78 करोड़ 15 लाख रूपिया के प्रशासनिक मंजूरी दे दे गे हे। ये फैसला ले प्रदेश मं स्वास्थ्य शिक्षा अउ रोजगार दुनों मं नवा राह खुलही।

राज्य बजट मं सामिल ये नवा कॉलेज मन बर हर संस्था बर करीबन 8 करोड़ 68 लाख रूपिया के राशि मंजूर होए हवय। ये नर्सिंग कॉलेज मन दंतेवाड़ा बैकुंठपुर, बीजापुर, बलरामपुर जशपुर , रायगढ़ , धमतरी , जांजगीर चांपा अउ नवा रायपुर (अटल नगर) मं बनही।

मुख्यमंत्री के कहना हवय – “हमर मन के मकसद हे के हर जिला मं गुणवत्तापूर्ण स्वास्थ्य शिक्षा मिलय अउ आधुनिक स्वास्थ्य सेवा बर कुशल नर्सिंग स्टाफ तियार होय। ये योजना ले ना सिरिफ स्वास्थ्य व्यवस्था मजबूत होही बल्कि युवामन बर रोजगार अउ आत्मनिर्भरता के अवसर घलो बनही।”

स्वास्थ्य मंत्री श्याम बिहारी जायसवाल कहिन – “मुख्यमंत्री के दूरदर्शी सोच ले छत्तीसगढ़ मं स्वास्थ्य शिक्षा मं नवा दिशा मिलत हवय। ये नवा कॉलेज मन ले प्रदेश के युवामन ला बढ़िया नर्सिंग शिक्षा, रोजगार अउ आत्मनिर्भरता के मौका मिलही। ये योजना छत्तीसगढ़ के स्वास्थ्य सेवा अउ मानव संसाधन विकास के क्षेत्र मं नवा आयाम देही।”

ये फैसला ले छत्तीसगढ़ मं स्वास्थ्य शिक्षा के स्तर बढ़ही, जिला-जिला मं नर्सिंग शिक्षा पहुंचही अउ हजारों युवामन बर नवा रोजगार के राह खुलही।