नकली होलोग्राम ले शराब तस्करी के भंडाफोड़, 3229 लीटर जब्त, 7 आरोपी गिरफ्तार
महासमुंद। जिला मं अवैध शराब के खिलाफ चलत विशेष अभियान के तहत सरायपाली पुलिस ह शराब तस्करी के एक बड़े संगठित नेटवर्क के खुलासा करे हवय। पुलिस ह नकली होलोग्राम अउ छत्तीसगढ़ स्टेट के फर्जी लेबल लगाके शराब के तस्करी अउ बिक्री करे वाले आरोपी मन के खिलाफ कार्रवाई करे हवय। कार्रवाई के दौरान कुल 3229 लीटर 860 मिलीलीटर अवैध अंग्रेजी शराब जब्त करे गे हवय, जेन के कीमत करीब 22.15 लाख रुपिया बताय गे हवय।
पुलिस के मुताबिक, शराब तस्करी के ये नेटवर्क महासमुंद, सारंगढ़, रायगढ़ अउ जांजगीर जिला के अलग-अलग इलाका तक फैले हवय। ए मामला मं पहिली पांच आरोपी मन ला गिरफ्तार करे गे रहिस, फेर जांच के दौरान दू अउ आरोपी मन ला हिरासत मं लेगे गे हवय।
डस्टर कार अउ कंटेनर ले भारी मात्रा मं शराब बरामद
पुलिस के कार्रवाई के दौरान डस्टर कार क्रमांक CG 04 PS 3481 ले 25 पेटी मं भरे 1192 पौव्वा गोवा अंग्रेजी शराब बरामद करे गे। ए शराब के कुल मात्रा 214 लीटर 560 मिलीलीटर अउ कीमत करीब 1,43,040 रुपिया बताय गे हवय।
वहीं, कंटेनर ट्रक क्रमांक HR-13-X-3220 के तलाशी ले 345 पेटी गोवा अंग्रेजी शराब मिलिस। हर पेटी मं 48-48 पौव्वा रहिस। कंटेनर ले कुल 2980 लीटर 800 मिलीलीटर शराब बरामद होइस, जेन के कीमत करीब 19,87,200 रुपिया बताय गे हवय।
एखर अलावा आरोपी अमित पटेल के कब्जा ले अलग-अलग ब्रांड के 46 बोतल अंग्रेजी शराब घलो बरामद करे गे। एमा कुल 34 लीटर 500 मिलीलीटर शराब रहिस। ए तरह पुलिस ह कुल 3229 लीटर 860 मिलीलीटर शराब जब्त करे हवय, जेन के कीमत 22,15,120 रुपिया बताय गे हवय।
जांच मं नकली होलोग्राम अउ फर्जी लेबल के खुलासा
जांच के बखत शराब के बोतल मं लगे होलोग्राम अउ लेबल ऊपर पुलिस ला संदेह होइस। आबकारी विभाग के जांच मं होलोग्राम अउ लेबल नकली होय के पुष्टि होइस। एखर बाद मामला मं फर्जीवाड़ा अउ संगठित अपराध से जुड़ी धारा घलो जोड़े गे।
पुलिस के जांच मं नकली होलोग्राम, फर्जी लेबल, बोतल अउ शराब के सप्लाई ले जुड़े अंतरराज्यीय नेटवर्क के जानकारी सामने आइस। ए नेटवर्क ले जुड़े आरोपी धीरज आहूजा ला पुलिस ह हरियाणा ले गिरफ्तार करे हवय।
थोक खरीदार ले सप्लायर तक आरोपी गिरफ्तार
पुलिस के अनुसार गिरफ्तार आरोपी मन मं अजित पटेल अउ अमित पटेल ला कंटेनर ले आवत अवैध शराब के थोक खरीदार बताय गे हवय। राजेश पटेल ऊपर स्थानीय स्तर मं थोक शराब बिक्री करे के आरोप हवय।
विनय सिंह ठाकुर रायगढ़ इलाका मं अवैध शराब बिक्री के नेटवर्क ले जुड़े बताए गे हवय। वहीं धीरज आहूजा ऊपर नकली होलोग्राम, लेबल, बोतल अउ शराब के कंटेनर उपलब्ध कराय मं जुड़े होय के आरोप हवय। पुलिस ला जांच के दौरान ए नेटवर्क के दूसर राज्य तक फैले होय के साक्ष्य घलो मिले हवय।
50 लाख ले जियादा के संपत्ति जब्त
पुलिस ह अवैध शराब के संग तस्करी मं इस्तेमाल होवत वाहन अउ मोबाइल फोन घलो जब्त करे हवय।
- 3229.860 लीटर अवैध अंग्रेजी शराब – 22,15,120 रुपिया
- डस्टर कार – करीब 3 लाख रुपिया
- कंटेनर ट्रक – करीब 10 लाख रुपिया
- क्रेटा कार – करीब 15 लाख रुपिया
- 3 मोबाइल फोन – करीब 15 हजार रुपिया
ए तरह कुल जब्त संपत्ति के कीमत करीब 50,30,120 रुपिया बताय गे हवय।
जांच बढ़त-बढ़त सात आरोपी तक पहुंचिस
ए मामला मं पुलिस ह पहिली राजेश पटेल, अजित पटेल, अमित पटेल, विनय सिंह ठाकुर अउ धीरज आहूजा ला गिरफ्तार करे रहिस। एखर बाद 25 सितंबर 2026 ला आयुस महापात्र अउ स्वरूप सिंह सलूजा ला घलो गिरफ्तार करे के जानकारी पुलिस ह दीस। ए तरह मामला मं अब तक कुल सात आरोपी पुलिस के गिरफ्त मं हें।
पुलिस अब ये पता लगावत हवय कि नकली होलोग्राम अउ फर्जी लेबल कहां तैयार करे जात रहिस, शराब के असली स्रोत का रहिस अउ ए शराब ला कऊन-कऊन इलाका मं सप्लाई करे जात रहिस।
इन धारामन के तहत दर्ज हवय मामला
सरायपाली थाना मं अपराध क्रमांक 264/2026 के तहत धारा 34(2), 59(क) आबकारी एक्ट अउ धारा 111(2), 338, 336(3), 340(4) बीएनएस के तहत कार्रवाई करे जा रहिस। पुलिस के मुताबिक, अवैध शराब के स्रोत, परिवहन, बिक्री अउ नकली होलोग्राम तैयार करे वाले नेटवर्क के संबंध मं जांच अभी जारी हवय।
