रायपुर के गुढ़ियारी मा मंदिर परिसर के मूरती मन ला पहुंचाइन नुकसान, इलाका मा तनाव
रायपुर। रायपुर के गुढ़ियारी इलाका मा बिहनिया-बिहनिया मंदिर परिसर मा भगवान शिव, हनुमान जी अउ साईं बाबा के मूरती मन टूटे पाए के खबर से हड़कंप मच गे। घटना के जानकारी मिलत ही भारी संख्या मा लोगन मन मौका मा पहुँच गीन। मामला के गंभीरता ला देखत पुलिस ह इलाका मा अतिरिक्त बल तैनात कर दे हे।
बिहनिया लोगन मन देखीन टूटे मूरती
जानकारी के मुताबिक, गुढ़ियारी थोक मार्केट के पड़ाव क्षेत्र मा स्थित मंदिर मा बिहनिया स्थानीय लोगन मन के नजर टूटे मूरती मन ऊपर परिस। एखर बाद आसपास के लोगन मन ला जानकारी दीस अउ देखत-देखत मंदिर परिसर मा भीड़ जमा हो गे।
स्थानीय लोगन मन ए घटना ऊपर भारी गुस्सा जताइन अउ दोसी मन के खिलाफ कड़ा कार्रवाई के मांग करीन।
बजरंग दल अउ विहिप कार्यकर्ता पहुँचीन मौका मा
घटना के खबर मिलत ही बजरंग दल अउ विश्व हिंदू परिषद के कार्यकर्ता मन घलो मौका मा पहुँच गीन। कार्यकर्ता मन मूरती ला नुकसान पहुँचाए के कड़ा विरोध करीन अउ पुलिस ले तुरंत कारवाही करे बर कहीन।
माहौल ला देखत पुलिस अधिकारी मन मौका मा पहुँच के लोगन मन ले बात करीन अउ शांति बनाए रखे के अपील करीन।
पुलिस ह शुरू करीस जांच
पुलिस ह पूरा मामला के जांच शुरू कर दे हे। आसपास लगे सीसीटीवी कैमरा के फुटेज खंगाले जावत हे। एखर अलावा स्थानीय लोगन अउ देखइया मन ले घलो जानकारी जुटाए जावत हे।
पुलिस ह ए पता लगाए के कोसिस करत हे कि मूरती ला नुकसान कोनो पहुँचाईस अउ ए घटना के पछाू का वजह रिहिस।
इलाका मा सुरक्षा बढ़ाई गीस
घटना के बाद गुढ़ियारी क्षेत्र मा पुलिस के तैनाती बढ़ा दे गे हे। अधिकारी मन के कहना हे कि कानून व्यवस्था बनाए रखे बर लगातार निगरानी करे जावत हे।
पुलिस ह लोगन मन ले अपील करे हे कि कोनो घलो किसम के अफवाह मा ध्यान जनि देवव अउ शांति बनाए रखव। मामला मा जांच के बाद आगू के कारवाही करे जाही।
