हॉस्टल नइ मिलही त भाड़ा देही सरकार, हर महीना मिलही 3 हजार

Chhattisgarh News : रायपुर। छत्तीसगढ़ के सरकारी कॉलेज मा पढ़ेइया एससी, एसटी अउ ओबीसी वर्ग के लइका मन बर राहत के खबर आए हवे। अब अगर कउनो लइका ला सरकारी हॉस्टल मा जगह नइ मिलही, त ओला भाड़ा के कमरा मा रहे बर सरकार कोती ले आर्थिक मदद दिए जाही। एखर बर राज्य सरकार ‘मुख्यमंत्री शिक्षा सहयोग योजना’ शुरू करे जावत हवे।

ए योजना के फायदा प्रदेश के लगभग 2.59 लाख लइका मन ला मिले के उम्मीद हवे। सरकार के उद्देश्य ए हवे कि हॉस्टल के कमी के सेती लइका मन के पढ़ाई मत रुकय अउ ओकर मन के आर्थिक परेशानी घलो कम होवय।

शहर के हिसाब ले मिलही हर महीना सहायता मुख्यमंत्री शिक्षा सहयोग योजना के तहत लइका मन ला ओकर कॉलेज वाले शहर के हिसाब ले कमरा के भाड़ा दिए जाही। ए पैसा साल मा 10 महीना तक मिलही। भुगतान तीन किस्त मा सीधे लइका मन के बैंक खाता मा भेजे जाही।

• Raipur मा पढ़ेइया लइका मन ला हर महीना ₹3,000 मिलही।

• संभाग मुख्यालय वाले शहर मन मा ₹2,500 प्रतिमाह दिए जाही।

• जिला अउ विकासखंड मुख्यालय मन मा पढ़ेइया लइका मन ला हर महीना ₹2,000 मिलही।

छह साल तक ले सकही योजना के लाभ लइका मन ए योजना के फायदा तय समय तक ले सकही। कॉलेज (स्नातक) के पढ़ाई बर जादा ले जादा चार साल अउ एमए/पीजी (स्नातकोत्तर) बर दो साल तक मदद मिलही। यानी एक लइका ला कुल छह साल तक ए योजना के फायदा मिल सकही।

सरकार के मुताबिक प्रदेश के 343 सरकारी कॉलेज मन मा लगभग 2.88 लाख लइका मन पढ़त हवें। एमा एससी, एसटी अउ ओबीसी वर्ग के लइका मन के संख्या लगभग 2.59 लाख हवे।

हॉस्टल के कमी ले लइका मन ला मिलही राहत सरकारी कॉलेज मन मा हॉस्टल के सीट कम रहे के सेती हर साल अब्बड़ अक्कन लइका मन ला भाड़ा के कमरा मा रहे बर परत रिहिस। एखर ले पढ़ाई के संग-संग ओकर परिवार ऊपर आर्थिक बोझ बाढ़ जात रिहिस। नवा योजना ले अइसन लइका मन ला कमरा के भाड़ा देवे मा मदद मिलही। खास करके गांव अउ गरीब परिवार के लइका मन ला एखर बढ़िया फायदा मिलही।

योजना बर ए हवय पात्रता मुख्यमंत्री शिक्षा सहयोग योजना के फायदा उठाए बर कुछ शर्त तय करे गय हवे:

• लइका के परिवार के सालाना कमाई 2.5 लाख रुपिया ले कम होना चाहि। चुनाव मेरिट के आधार मा करे जाही।

• कॉलेज (स्नातक) मा दाखिला लेइया लइका मन के 12वीं मा फर्स्ट डिवीजन (प्रथम श्रेणी) होना जरूरी हवे। ओतकेच पोस्ट ग्रेजुएशन (पीजी) बर कॉलेज मा कम ले कम 55 प्रतिशत नंबर होना जरूरी हवे।

हॉस्टल मा रहइया मन ला नइ मिलही फायदा ए योजना के फायदा ओही लइका मन ला मिलही जेमन ला सरकारी हॉस्टल मा जगह नइ मिले हवे। जेमन सरकारी, अनुदान प्राप्त या कउनो अउ संस्था के हॉस्टल मा रहत हवें, ओमन ए मदद बर पात्र नइ राहेंगे।

राज्य सरकार के मानना हवे कि ए योजना ले ऊंच शिक्षा बर लइका मन ला बढ़िया मौका मिलही अउ पैसा के कमी के सेती पढ़ाई छोड़े के समस्या घलो कम हो जाही।