एआई ले महिला मन के गलत फोटो बनाके सोशल मीडिया मा फैलाना गंभीर साइबर अपराध: डॉ. ममता साहू

ai photo cyber crime raipur : रायपुर। छत्तीसगढ़ राज्य महिला आयोग के अध्यक्ष डॉ. ममता साहू ह कहे हवें कि एआई (आर्टिफिशियल इंटेलिजेंस) के इस्तेमाल करके कोनो महिला के आपत्तिजनक फोटो बनाके सोशल मीडिया मा फैलाना बहुते गंभीर साइबर अपराध ए। अइसन मामला मन मा पीड़ित महिला मन ला तुरंते कानूनी कारवाही करे अउ एफआईआर दर्ज कराए के पूरा अधिकार हे।

30 मामला मन के होइस सुनवाई

राज्य महिला आयोग कार्यालय रायपुर मा आयोजित जनसुनवाई मा अध्यक्ष डॉ. ममता साहू अउ सदस्य दीपिका शोरी ह महिला उत्पीड़न ले जुड़े 30 मामला मन ला सुनवाई बर रखिन, जेमा ले 17 मामला मन के सुनवाई होइस अउ 5 प्रकरण ला नस्तीबद्ध (फाइल बंद) करे गिस।

एआई ले फोटो बनाके ब्लैकमेल करे के शिकायत

सुनवाई के बखत एक मामला मा महिला ह शिकायत करिस कि कुछ लोगन मन एआई तकनीक के गलत इस्तेमाल करके ओकर आपत्तिजनक फोटो बनावत हें अउ सोशल मीडिया मा वायरल करत हें। आयोग ह ये मामला ला गंभीरता ले लेवत साइबर अपराध मानिस अउ दोनो पक्ष ला अपन गोठ रखे के मौका देवत मामला ला आगू सुनवाई बर रखिस।

निष्पक्ष सुनवाई नइ होए के घलो आइस शिकायत

आयोग के अगाड़ी कुछ महिला मन ह शिकायत रखिन कि ओकर मामला मा सही अउ निष्पक्ष सुनवाई नइ होए हे। आयोग ह एला गंभीरता ले लेवत मामला के जांच अउ पुनर्विचार करे के बात कहिस।

पारिवारिक विवाद अउ संपत्ति के मामला मा सलाह

एक अउ मामला मा घरवाला-घरवाली के बीच झगड़ा अउ प्रताड़ना के शिकायत मा दोनो पक्ष के बीच समझौता होए के जानकारी मिलिस, जेला आयोग ह निगरानी मा रखे के फैसला करिस। ओहंदे संपत्ति विवाद अउ पारिवारिक प्रताड़ना ले जुड़े मामला मा आयोग ह महिला मन ला कानूनी मदद लेवे अउ शांतिपूर्वक रास्ता निकाले के सलाह दिस।

डॉ. ममता साहू ह कहिन कि महिला आयोग ह महिला मन के इज्जत, सुरक्षा अउ न्याय बर हमेशा खड़े हे। ओमन डिजिटल जमाना अउ सोशल मीडिया के बढ़त इस्तेमाल ला देखत महिला मन ला साइबर अपराध ले सचेत रहे अउ कोनो भी किसम के ऑनलाइन उत्पीड़न के तुरंत शिकायत करे बर अपील करिन।