खेत-खार के संग औजार मन के पूजा, घर-घर मा बनिस गुड़ के चीला अउ भजिया, हरेली तिहार के जम्मो संगवारी मन ला गाड़ा-गाड़ा बधाई
Chhattisgarh Hareli Tihar 2026 : रायपुर। छत्तीसगढ़ के पहिल तिहार ‘हरेली’ पूरे प्रदेश मा बड़े धूम-धाम अउ परम्परागत भाव ले मनाए जात हे। सावन अमावस के ये पावन दिन मा चारो कोती हरियाली के संग-संग गाँव-घर मा भारी उत्साह दिखे बर मिलत हे। किसान मन अपन खेती-किसानी के औजार अउ दाई माटी के पूजा-अर्चना करके सुख-समृद्धि के असीस माँगत हें।
नांगर अउ कृषि औजार मन के पूजा
हरेली के बिहनिया ले किसान भाई मन अपन हल (नांगर), कुदारी, फावड़ा, गैंती अउ सब्बल जइसे सबो औजार मन ला बढ़िया धो-माँझ के साफ करथें। अंगना मा मुरूम बिछा के औजार मन ला सजाए जाथे अउ धूप-दीप, नारियल चढ़ा के पूजा करे जाथे। घर-घर मा दाई-माई मन गुड़ के गरमा-गरम चीला अउ गुलगुला भजिया बनाथें, जेकर मऊजी भोग भगवान ला लगाए जाथे। गाँव के ठाकुरदेव अउ कुलदेवता के घलो पूजा-पाठ करे जाथे।
कोठा के मवेशी मन बर जड़ी-बूटी अउ सेवा
तिहार के दिन बिहनिया ले किसान मन अपन गाय, बैल अउ बछरू मन ला तालाब-पनघट मा ले जाके बढ़िया नहलाथें। पशुधन ला बीमारी ले बचाए बर आटा मा जड़ी-बूटी मिला के लोंदी पियाए जाथे। यादव समाज के लोगन मन जंगल ले खास किसम के वनौषधि अउ कंदमूल ला के लाथें अउ ठाकुरदेव ठन उबाल के किसान मन ला देवथें। एकर बदला मा किसान मन ह ओ मन ला आदर के संग चाउर अउ दाल उपहार मा देवथें।
बांस के गेड़ी अउ पारंपरिक खेल-कूद के रउनक
हरेली तिहार मा बांस के बने ‘गेड़ी’ के अपन अलगच मजा हे। लइका अउ जवान मन बांस के गेड़ी मा चढ़ के ‘रच-रच’ के अवाज करत गाँव के गली-मोहरा मा गजब कुदथें अउ आनंद लेथें। संझा बेर गाँव मा खेल-कूद के पूरा माहौल जम जाथे। लइका मन नारियल फेंक अउ कबड्डी खेलथें, त अउंहे बहु-बेटी मन नवा कपड़ा पहिन के सावन झूला, फुगड़ी, खो-खो अउ बिल्लस खेल के तिहार ला अउ रंगीन बना देथें।
नीम के डाँगा अउ लोहार के कील ठोके के रिवाज
गाँव मा अनिष्ट अउ बुरी नजर ले बचे बर पुरखा मन के रिवाज आजू घलो कायम हे। राऊत अउ बैगा मन सबो घर के दुआर मा नीम के डाँगा खोंचथें, अउ लोहार मन चौखट मा लोहा के कील मारथें। चारो कोती छाये हरियाली अउ ढोल-मांदर के गूँज ले पूरा छतीसगढ़ मा हरेली के भारी रउनक दिखे बर मिलत हे।
