दुर्ग यूनिवर्सिटी के कुलसचिव गिरफ्तार, महिला कर्मचारी के पगार के पईसा ला डरा-धमका के गबन करे के आरोप

Durg। दुर्ग यूनिवर्सिटी के कुलसचिव भूपेंद्र कुलदीप ला महिला कर्मचारी के पगार गबन करे के मामला म मोहन नगर थाना पुलिस हा गिरफ्तार कर के जेल भेज दे हे। कुलसचिव ऊपर आरोप हे कि ओ हा यूनिवर्सिटी के एक दैनिक वेतन भोगी महिला कर्मचारी ले घर म खाना बनवावत रिहिस अउ ओकर पगार के ज्यादातर पईसा ला अपन बेटा के खाता म ट्रांसफर करवा लेवत रिहिस।

महिला ला हर महीना बैंक खाता म 15,515 रुपे पगार मिलत रिहिस, जेम ले कुलसचिव ओला सिर्फ 2,200 रुपे देवत रिहिस अउ बाकी के पईसा ला पेटीएम ले अपन बेटा के खाता म डलवा लेवत रिहिस। डर के मारे महिला हा महीनों तक कछु नी बोलिस, अउ ए कसिम ले कुलसचिव हा ओकर ले कुल 1,49,384 रुपे हड़प लीस। महिला के शिकायत के बाद पुलिस हा एफआईआर दर्ज कर के जांच शुरू करिस अउ वित्तीय रिकॉर्ड अउ दस्तावेज म गड़बड़ी पाए जाए के आधार म कुलसचिव ला गिरफ्तार कर के कोर्ट म पेश करिस, जिहां ले ओला जेल भेज दिए गिस।

एकर ले पहिले घलो कुलसचिव भूपेंद्र कुलदीप ऊपर सरकारी गाड़ी के निजी इस्तेमाल करे, एक्सीडेंट के बाद बिना शासकीय प्रक्रिया के विश्वविद्यालय के फंड ले गाड़ी के मरम्मत करवाए अउ बीमा क्लेम नी लेके यूनिवर्सिटी ला आर्थिक नुकसान पहुंचाए के गंभीर आरोप लाग चुके हे। ए मामला म उच्च शिक्षा विभाग हा ओला नोटिस जारी कर के पईसा वसूली करे के तैयारी करत रिहिस, लेकिन ओकर ले पहिलेच पगार गबन के ए नवा मामला म कुलसचिव ला जेल जाना पड़ गिस।